Een Häerzstéck an der schoulescher Ausbildung vun den zukünftegen Educateuren*tricen am LTPES si sécher déi Perioden, wärend deenen eis Schüler*innen am Stage sinn. Fir dës Perioden ubidden ze kënnen, brauche mir engagéiert, qualifizéiert a motivéiert Institutiounen an Tuteuren*tricen, déi sech bereet erklären, eis Schüler*innen op hirem Wee zum Éducateur, zur Éducatrice oder zum Agent socio-éducatif ze begleeden.
GED-Schüler*inne komme mat 17 oder 18 Joer bei eis an de Lycée, nodeems si eng 3e-Klass ofgeschloss hunn, DAP-Schüler*innen am Alter vu 15 oder 16 Joer, nodeems si eng 5e erfollegräich ofgeschloss hunn. Fir dës Schüler*inne beschtméiglechst op de polyvalente Beruff vum Erzéier oder der Erzéierin virzebereeden, bidde mir hinnen Stageméiglechkeeten an méiglechst ville Beräicher vun der sozialer an edukativer Aarbecht un, an zwar a Crèchen, a Maisons Relais’en, a Jugendhaiser, a Précoce-Klassen (Cycle 1.0 vum EF), an Altersheemer, a Wunngruppe fir Mënsche mat enger Beanträchtegung, op Aarbechtsplazen fir Leit mat enger Beanträchtung, an a ville weideren Institutiounen.
Eis GED-Schüler*innen absolvéieren an deenen eenzelnen Ausbildungsjoren Stagen an ënnerschiddlechen Aarbechts- an Tätegkeetsberäicher, déi awer vun den Ufuerderungen hir openeen opbauen. Si erméiglech de d’Schüler*innen a Student*innen ze léieren, Theorie a Praxis mateneen ze verbannen.
Op der 2GED maachen d’Schüler*innen insgesamt 9 Wochen Stage, op der 1GED 6 Wochen Stage an op der Terminale 1SGED 11 Wochen.
Am DAP Éducation ginn d’Schüler*innen haaptsächlech ausgebilt fir d’Aarbecht mat Kanner. Hei ass, ausser am 1. Semester, all Semester ee Stage vu 6 Wochen an Aarbechtsfelder bei Kanner oder jonke Jugendlechen virgesinn.

D’Organisatioun vun de Stagen leeft iwwert den hausinterne Manager-Programm.
An dëser Rubrik fannen d’Institutiounen an d’Schüler*innen a Student*innen den Accès zum Manager-Programm esou wéi all néideg Ënnerlagen ewéi d’Handbicher fir all Joergank, d’Toolbox a Villes méi.