Felicitatiounen un eis éischt Promotioun vun der Formatioun vum Agent socio-pédagogique!
Den 8. Oktober kruten si hiren Diplôme d’aptitude professionelle (DAP) an der Rockhal zu Esch/Uelzecht iwwerreecht.
Mir si stolz op Iech a wënschen Iech vill Erfolleg an Erfëllung an Ärer berufflecher Zukunft.el.

©️Fotoen: Photography Raoul Somers sarl Ministère de l'Éducation nationale, de l'Enfance et de la Jeunesse

 Eng Grupp vun 12 StudentInnen an enger Léierpersoun aus dem LTPES huet den 1.10.2025 déi legendär Photosammlung „The Family of Man“ vum Edward Steichen am Schlass vu Klierf besicht.

D’Ausstellung ass Deel vum UNESCO „Weltdokumentenerbe“.

De Photoen hir Botschaft ass zäitlos a ganz relevant: Mir sinn all Mënschen, trotz all eisen Ënnerscheeder, an eng global Famill!

D‘StudentInnen hunn d’Ausstellung fir sech als zukünfteg/en Educatrice/Educateur mat sengen interaktiven Aktivitéite kenne geléiert.

Ee grousse Merci am Numm vum LTPES un déi ganz kompetent Equipe vum Centre national de l’audiovisuel fir déi immens informativ Visite guidée!

Den 06.10.2025 konnte mir eise Schüler*inne gratuléieren, déi hir Noexame gepackt hunn. Fir si hu mir eng Mini-Diplomiwwerreechung organiséiert, op der si hiren Diplom iwwerreecht kruten.

Fir vill vun de Jonken ass den Ofschloss vun der Première just den Ufank vun hirem akademeschen oder beruffleche Wee. Hiren Erfolleg weist, datt si bereet sinn, nei Erausfuerderungen unzehuelen a weider op hir Ziler zou ze schaffen.

Léif Laureaten, mir wënschen Iech alles Guddes fir Är berufflech a perséinlech Zukunft. Gitt mat Courage, Vertrauen an Optimismus an déi nächst Etapp vun Ärem Liewen. Egal wou äre Wee Iech hiféiert, denkt drun, datt Dir ëmmer eise Stolz an e wichtege Bestanddeel vun der LTPES-Famill bleift.

Mir freeën eis och iwwert all déi Student*innen, déi sech decidéiert hunn, weiderhin an eisem Lycée fir eng 1SGED ze bleiwen an ënnerstëtzen si gäre weiderhin op hirem Wee fir Educateur*trice ze ginn!

Fotoen sinn um Sharepoint gesat, gitt also ëmmer emol erëm dohi luussen

Déi 4. Editioun vum Symposium „Beweegung, méi ewéi nëmmen Sport? Sport, méi ewéi nëmmen Beweegung?” vun Elisabeth, dem INAPS - Institut national de l'activité physique et des sports,dem  Institut de formation de l'Education nationale - IFEN, GIMB, der LASEP an dem LTPES am LTPES war erëm ee grousse Succès. De Symposium huet sech nees mam Wierkungsgeflecht vu Beweegung a Sport am Kontext vun der ganzheetlecher Entwécklung bei ganz klenge Kanner, bei Kanner a bei Jugendlechen auserneen gesat, mam d'Zil, d’Akteuren am Beräich vun der Beweegungsförderung ze ënnerstëtzen.

De Schwéierpunkt luch dëst Joer op den Themen Zirkus-, Outdoor- an Erliefnespädagogik. D’Keynotespeaker Steven Desanghere a Vincent Wouters ewéi déi ca. 15 parallel Workshopen op jeeweils 3 Plagen ware spannend a motivéierend. Och wann d’Wierder et net zougelooss huet, datt alles ewéi geplangt stattfanne konnt, esou huet déi an edukative Kontexter verlaangte Flexibilitéit, déi vun bal 200 Participanten un den Dag geluet ginn ass, et erlaabt, dee ganze Symposium trotzdeem zu engem groussen Erfolleg ginn ze loossen. All Präsentatiounen a Workshops hu gewisen, wéi eng flott a wichteg Roll Zirkus-, Outdoor- an Erliefnespädagogik am Beräich vun der Beweegungsförderung spillen.

Passend zum Thema Zirkus hunn d’Emilie an de Finn de Symposium duerch immens anspruchsvoll Zirkuspräsentatiounen ënnert der Leedung vum Jorge Pinto agerummt.

Jidderengem, deen do war, ee grousse Merci! Mir gesinn eis an engem Joer erëm😉.